ສໍາພາດພິເສດ "ອາ ສາຍແກ້ວ" ຊ່າງແຕ່ງໜ້າອັນດັບໜຶ່ງຂອງລາວ ຜູ້ຢູ່ເບື້ອງຫລັງຊຸດປະຈໍາຊາດຂອງ Miss Grand Laos

ໃນການປະກວດ Miss Grand International ຫລາຍໆຄົນກໍໃຫ້ຄວາມສົນໃຈ ເພາະກໍເປັນປີທໍາອິດທີ່ປະເທດລາວຂອງພວກເຮົາໄດ້ເຂົ້າຮ່ວມ ໂດຍສະເພາະຊຸດປະຈໍາຊາດທີ່ ຈິນນາລີ ນໍລະສິງ ມີສແກຣນຄົນທໍາອິດຂອງລາວ ທີ່ຈະໃຊ້ໃນການແຂ່ງຂັນຮອບປະກວດຊຸດປະຈໍາຊາດດີເດັ່ນໃນຄໍ່າຄືນນີ້ (12 ຕຸລາ 2017) ດັ່ງນັ້ນໃນມື້ນີ້ Muan.la ເລີຍຈະພາໄໄປຮູ້ຈັກກັບຜູ້ທີ່ຢູ່ເບື້ອງຫລັງໃນການອອກແບບຂອງຊຸດດັ່ງກ່າວນີ້.

ອາ ສາຍແກ້ວ ສີດາວົງ ເຈົ້າຂອງຮ້່ານແພັດຕີ້ເສີມຄວາມງາມ ເປັນຜູ້ທີ່ເນລະມິດຄວາມງາມໃຫ້ກັບດາລາ ແລະເຊເລັບຄົນດັງທົ່ວປະເທດລາວ ແລະຍັງເປັນນັກປັ້ນມືທອງທີ່ປັ້ນນາງງາມລະດັບປະເທດມາແລ້ວຢ່າງ ບຸດສະບາ ແສງປັນ  (Miss Laos) ,ຈິນນາລີ ນໍລະສິງ (Miss Grand Laos) ແລະ ຕົ້ນຄໍາ ພົນຈັນເຮືອງ (Miss World Laos) ແລະຍັງເປັນຜູ້ທີ່ຄິດ ແລະອອກແບບຊຸດດັ່ງກ່າວໂດຍໃຊ້ຊື່ຕາມໂຄງການວ່າ ຊຸດ Miss Grand Laos ເປັນຊຸດທີ່ມີຮູບຊົງເປັນພະທາດຫລວງ ເຊິ່ງຊຸດນີ້ໄດ້ແຮງບັນດານໃຈມາຈາກພະທາດຫລວງວຽງຈັນ ທີ່ເປັນປູຊະນີຍະສະຖານທີ່ເກົ່າແກ່ ແລະ ສຳຄັນແຫ່ງຫນຶ່ງຂອງປະເທດລາວ ແລະຍັງເປັນສູນລວມຈິດໃຈຂອງປະຊາຊົນລາວທັງຊາດ.

ການອອກແບບຊຸດແມ່ນໄດ້ຍົກເອົາເອກະລັກ ແລະ ລັກສະນະເດັ່ນຂອງພະທາດຫລວງມາດັດແປງໃຫ້ເປັນອົງປະກອບຂອງຊຸດ ແລະ ພາກສ່ວນເຄື່ອງປະດັບ ແມ່ນໄດ້ນຳເອົາອົງປະກອບ ແລະ ຮູບຊົງຂອງພະທາດຫລວງມາເຮັດໃຫ້ເກີດລູກຫລິ້ນ ໂດຍສາມາດເຮັດໃຫ້ຊຸດເບີ່ງມີມິຕິ ແລະ ສະແດງໃຫ້ເຫັນເຖີງວັດທະນະທຳ , ສິລະປະ ແລະ ລວດລາຍຄວາມເປັນລາວຫລາຍຂື້ນ ທາງດ້ານໂທນສີຂອງຊຸດ ແມ່ນຈະເນັ້ນໃຊ້ສີຄຳຄືດັ່ງພະທາດຫລວງ ແລະ ສີຂອງກົມມະລຽນທີ່ອ້ອມຮອບພະທາດມາເປັນສີຫລັກໃນການເຮັດຊຸດນີ້ ແລະ ເອົາລວດລາຍຕ່າງໆທີ່ເປັນສີລະປະລາຍລາວເພີ່ມເຂົ້າໄປໃນຊຸດ ໂດຍຜ່ານສາວງາມ ເພື່ອນຳສະເຫນີ ແລະ ເຜີແຜ່ຊຸດໃຫ້ຊາວຕ່າງຊາດໄດ້ເຫັນເຖິງວັດທະນະທຳ, ຮີດຄອງປະເພນີ ເອກະລັກຄວາມເປັນຊາດລາວໄດ້ຢ່າງລົງໂຕ ແລະທີ່ຕັດສິນເລືອກເອົາພະທາດຫລວງເປັນຫລັກໃນການອອກແບບຄັ້ງນີ້ແມ່ນເພາະວ່າພະທາດຫລວງເປັນສູນລວມຈິດໃຈຂອງປະຊາຊົນລາວ ເມື່ອແຂກຕ່າງປະເທດເຂົ້າມາຢ້ຽມຢາມປະເທດຂອງເຮົາກໍແມ່ນຕ້ອງໄປຢ້ຽມຢາມພະທາດຫລວງກ່ອນໝູ່ ດັ່ງນັ້ນຈຶ່ງເລືອກພະທາດຫລວງເພື່ອໄປເອກອ້າງໃຫ້ຄົນທົ່ວໂລກໄດ້ເຫັນ.

ວັດສະດຸຫລັກທີ່ໃຊ້ໃນການເຮັດຊຸດຄັ້ງນີ້ແມ່ນເປັນຢາງພາລາ ເຊິ່ງຈະມີນໍ້າໜັກທີ່ເບົາ ແຕ່ມີຄວາມໜຽວ ແລະມີຄວາມທົນທານ. ສ່ວນນໍ້າໜັກຂອງຊຸດແມ່ນມີຄວາມໜັກ 20 ກິໂລກຣາມ ໃຊ້ເວລາອອກແບບພຽງແຕ່ໜຶ່ງອາທິດປາຍເທົ່ານັ້ນ ແລະໃຊ້ເວລາຕັດແມ່ນໜື່ງເດືອນປາຍ.

ສໍາລັບການຂົນສົ່ງຊຸດດັ່ງກ່າວນັ້ນ ອາ ສາຍແກ້ວ ສີດາວົງ ກ່າວວ່າ ບໍ່ມີຄວາມຫຍຸ້ງຍາກ ເພາະຊຸດສາມາດແຍກຊິ້ນສ່ວນໄດ້ ໂດຍຈະສາມາດປະກອບເຂົ້າກັນຄືນໄດ້ເມື່ອຈະໃຊ້ງານ.

ແລະໃນມື້ນີ້ຊຸດດັ່ງກ່າວກໍຈະປະກົດສູ່ສາຍຕາຂອງຄົນທົ່ວໂລກໃນນາມຂອງຊຸດປະຈໍາຊາດຂອງ Miss Grand Laos ທີ່ເວທີໃຫຍ່ Miss Grand International ທີ່ປະເທດຫວຽດນາມ. ເຮົາມາສົ່ງແຮງໃຈເຊຍໃຫ້ຊຸດຈາກສີມືຂອງຄົນລາວເຮົາໄດ້ຮັບລາງວັນອັນຊົງກຽດຈາກເວທີນີ້ໄປນໍາກັນ.