ກະຊວງຕ່າງປະເທດ ສ້າງຂະບວນການສະຫລອງ 72 ປີ ວັນການທູດລາວ

ຂປລ.ເນື່ອງໃນໂອກາດ ຄົບຮອບ 72 ປີ ວັນການທູດລາວ (12/10/1945-12/10/2017), ຄະນະ​ນຳກະຊວງການຕ່າງປະເທດ ໄດ້ສ້າງຂະບວນການສະເຫລີມສະຫລອງ ເພື່ອຂ່ຳນັບຮັບຕ້ອນວັນສຳຄັນດັ່ງກ່າວຂຶ້ນຢ່າງມີເນື້ອໃນ ແລະ ເປັນຂະບວນຟົດຟື້ນ ໃນປີ 2017 ນີ້ ​ເຊິ່ງ​ໄດ້ຈັດກິດຈະກຳ ຕ່າງໆ ເຊັ່ນ: ການເຂົ້າ​ຢ້ຽມຊົມຫ້ອງ​ມູນ​ເຊື້ອການ​ເຄື່ອນ​ໄຫວ​ວຽກງານ​ຕ່າງປະ​ເທດ, ການຈັດງານເທດ ສະການ ອາຫານຂອງສະຫະພັນແມ່ຍິງກະຊວງແລະການແຂ່ງຂັນກິລາບານ ເຕະມິດຕະພາບຊາວ ໜຸ່ມ ຂອງບັນດາກົມໃນກະຊວງການຕ່າງປະເທດ. ພ້ອມກັນນັ້ນ, ກະຊວງການຕ່າງປະເທດ ຍັງໄດ້ຈັດພິທີການເປີດປຶ້ມ “ການທູດລາວ 70 ປີ” ທີ່ໄດ້ສັງລວມເອົາຜົນການເຄື່ອນໄຫວວຽກງານການທູດ ຕະຫລອດໄລຍະ 70 ປີ ຜ່ານມາ. ການສ້າງ ຂະບວນການສະເຫລີມສະຫລອງ ທີ່ຟົດຟື້ນ ແລະ ມີຄວາມໝາຍດັ່ງກ່າວ ແມ່ນເພື່ອຊຸກຍູ້ສົ່ງເສີມ ໃຫ້ນັກການທູດ ກໍຄືພະນັກງານ ກະຊວງການຕ່າງປະເທດ ໄດ້ຮູ້ເລິກເຊິ່ງເຖິງ ຄວາມໝາຍຄວາມສຳຄັນ ຂອງ ວັນການທູດລາວ ກໍຄືໝາກຜົນຂອງການເຄື່ອນໄຫວວຽກງານ ການຕ່າງປະເທດຂອງ ສປປ ລາວ, ພ້ອມທັງ ເປັນການສ້າງ ຄວາມສາມັກຄີພາຍໃນ ລະຫວ່າງພະນັກງານກະຊວງການ ຕ່າງປະເທດໃຫ້ ແໜ້ນແຟ້ນ ແລະ ເຂັ້ມແຂງຍິ່ງຂຶ້ນ.

ໃນ 72 ປີ ທີ່ຜ່ານມາ, ການເຄື່ອນໄຫວວຽກງານການທູດລາວ ໄດ້ຮັບຜົນສຳເລັດອັນໃຫຍ່ຫລວງ, ເຊິ່ງເຫັນໄດ້ຈາກ ສປປ ລາວ ມີຖານະບົດບາດໃນເວທີພາກພື້ນ ແລະ ສາກົນ ທີ່ນັບມື້ນັບພົ້ນເດັ່ນຂຶ້ນ ທັງໃນກອບສອງຝ່າຍ ແລະ ຫລາຍຝ່າຍ, ມີເພື່ອນມິດສາກົນຢ່າງກວ້າງຂວາງ, ຫລາຍປະເທດມີຄວາມ ສົນໃຈມາລົງທຶນໃນລາວ ນັບມື້ນັບຫລາຍຂຶ້ນ ແລະ ບັນດານັກທ່ອງທ່ຽວຕ່າງປະເທດ ກໍມີຈຳນວນເພີ່ມຂຶ້ນ ໃນແຕ່ລະປີ. ຮອດປັດຈຸບັນ, ສປປ ລາວ ໄດ້ສ້າງຕັ້ງສາຍພົວພັນການທູດກັບ 140 ປະເທດ, ມີສຳ ນັກງານຕາງໜ້າການທູດຢູ່ຕ່າງປະເທດ 39 ແຫ່ງ, ໃນນີ້ ມີສະຖານເອກອັກຄະລັດຖະທູດ 26 ແຫ່ງ, ສຳ ນັກງານຜູ້ຕາງໜ້າຖາວອນ 3 ແຫ່ງ, ກົງສູນໃຫຍ່ 9 ແຫ່ງ ແລະ ຫ້ອງການກົງສູນ 1 ແຫ່ງ.

ຜົນສຳເລັດ ຂອງວຽກງານການຕ່າງປະເທດ ກໍຄືວຽກງານ ການທູດຂອງພັກ ແລະ ລັດ ທີ່ຍາດມາໄດ້ນັ້ນ ແມ່ນຍ້ອນແນວທາງນະໂຍບາຍ ທາງອັນຖືກຕ້ອງສອດຄ່ອງ ແລະ ການຊີ້ນຳໆພາຂອງພັກ ແລະ ລັດຖະບານຢ່າງໃກ້ຊິດ, ຍ້ອນການເຄື່ອນໄຫວ ການທູດຂອງການນຳພັກ-ລັດ ທີ່ຫ້າວຫັນບໍ່ຮູ້ອິດເມື່ອຍ; ພ້ອມດ້ວຍຄວາມຮັບຜິດຊອບ ແລະ ການປະກອບສ່ວນຮ່ວມແຮງຮ່ວມໃຈຂອງ ບັນດາຊັ້ນຄົນໃນທຸກຂະແໜງການຕ່າງໆ, ພະນັກງານ, ທະຫານ, ຕຳຫລວດ, ແຕ່ສູນກາງລົງຮອດທ້ອງຖິ່ນ, ຕະຫລອດຮອດ ນັກທຸລະກິດ ແລະ ພໍ່ແມ່ປະຊາຊົນລາວບັນດາເຜົ່າໃນທົ່ວປະເທດ ລວມທັງຄົນລາວທີ່ຮັກຊາດທີ່ອາ​ໄສຢູ່ ຕ່າງປະເທດ.