ເຮືອນຊົງລາວ ຂອງຂວັນຈາກລັດຖະບານລາວ ໃຫ້ອະນຸ ສອນສະຖານໂຮ່ຈິມິງ

  ຂປລ. ທ້າ​ຍ​ເດື​ອນກັນຍາ 2017, ຄະນະຜູ້ແທນຈາກລັດຖະບານລາວ ສົມທົບກັບກອງບັນຊາການທະຫານເຂດ 4 ແຂວງ ເງະອານ ຈັດພິທີມອບ-ຮັບ ແລະ ເປີດນຳໃຊ້ໂຄງການກໍ່ສ້າງເຮືອນຊົງລາວ ຢູ່ເຂດອະນຸສອນສະຖານປະທານ ໂຮ່ຈິມິງ ຢູ່ບ້ານກີມລຽນ ເມືອງ ນາມດ່ານ ແຂວງ ເງະອານ, ​ເຊິ່ງ​ເປັນ​ຂອງຂວັນ​ຈາກ​ລັດຖະບານ​ລາວ, ເນື່ອງໃນໂອກາດສະເຫລີມສະຫລອງ ປີສາມັກຄີມິດຕະພາບລາວ-ຫວຽດນາມ, ຫວຽດນາມ-ລາວ 2017 ຄື 55 ປີ ວັນສ້າງຕັ້ງສາຍພົວພັນການທູດ (05/9/1962-​05/9/2017) ແລະ 40 ປີ ວັນເຊັນສົນທິສັນຍາມິດຕະພາບ ແລະ ການຮ່ວມມື (18/7/1977-18/7/2017) ແລະ ຂ່ຳ ນັບຊົມເຊີຍ ວັນຊາດ ສສ ຫວຽດນາມ ຄົບຮອບ 72 ປີ (2 ກັນຍາ 1945 -​2 ກັນຍາ 2017).

ທ່ານ ພົນຕີ ພູວົງ ວົງພົມ ຮອງລັດຖະມົນຕີ ກະຊວງປ້ອງກັນປະເທດ ກ່າວວ່າ: ອະນຸສອນສະຖານແຫ່ງນີ້ ສະແດງໃຫ້ເຫັນເຖິງນ້ຳໃຈ, ຄວາມສາມັກຄີ, ການເຄົາລົບນັບຖືຂອງພັກ, ລັດຖະບານ, ກອງທັບ ແລະ ປະຊາຊົນລາວ ທີ່ມີຕໍ່ປະທານໂຮ່ຈິມິງ ກໍຄື ຕໍ່ປະເທດຊາດຫວຽດນາມ. ພ້ອມດຽວກັນກໍ່ຍັງເປັນບ່ອນພົບປະສັງສັນ, ເປັນບ່ອນໃຫ້ຄົນລຸ້ນໜຸ່ມໄດ້ຊອກຮູ້ຮ່ຳຮຽນ ຄວາມສາມັກຄີມິດຕະພາບແບບພິເສດ ລາວ-ຫວຽດນາມ.

ໂຄງການເຮືອນຊົງລາວ ຢູ່ເຂດອະນຸສອນສະຖານປະທານໂຮ່ຈິມິງ ໄດ້ເລີ່ມກໍ່ສ້າງໃນວັນທີ 22 ກໍ ລະກົດ 2016, ເປັນອາຄານ 2 ຊັ້ນ ແບບເຮືອນຊົງລາວບູຮານ ທີ່ເປັນເອກະລັກ, ມີເນື້ອທີ 315 ຕາແມັດ ແລະ ໄດ້ສຳເລັດການ ກໍ່ສ້າງພາຍໃນ 1 ປີ. ນີ້ແມ່ນໂຄງການທີ່ມີຄວາມໝາຍທາງດ້ານການເມືອງ, ວັດທະນະທຳ-ສັງຄົມ ແລະ ການຕ່າງປະເທດ, ເປັນຂອງຂວັນທີ່ມີຄວາມໝາຍຢ່າງແທ້ຈິງ ຕໍ່ຄວາມສາມັກຄີມິດຕະພາບແບບພິເສດ, ຄວາມຜູກພັນ ສະໜິດແໜ້ນ, ສັດຊື່ບໍລິສຸດ ປອດໃສຂາວສະອາດ ຂອງສອງຊາດລາວ-ຫວຽດນາມ.

         ເຂົ້າຮ່ວມພິທີດັ່ງກ່າວ, ມີ ສະຫາຍ ພົນໂທ ວິໄລ ຫລ້າຄຳຟອງ ເລຂາທິການສູນກາງພັກ, ຮອງລັດຖະມົນຕີກະຊວງປ້ອງກັນປະເທດ, ຫົວໜ້າກົມໃຫຍ່ການເມືອງກອງທັບປະຊາຊົນລາວ, ສະຫາຍ ພົນຕີ ພູວົງ ວົງພົມ ຮອງລັດຖະມົນຕີກະຊວງປ້ອງກັນປະເທດ, ຫົວໜ້າຮັບຜິດຊອບໂຄງການກໍ່ສ້າງເຮືອນຊົງລາວ ພ້ອມຄະນະ. ຝ່າຍຫວຽດນາມ ມີ ສະຫາຍ ພົນໂທ ເຈິ່ນເດີນ ກຳມະການສູນກາງພັກ, ຄະນະປະຈຳພັກການທະຫານສູນກາງ, ຮອງລັດຖະມົນຕີ ກະຊວງປ້ອງກັນປະເທດຫວຽດນາມ ​ແລະ ພາກສ່ວນ​ກ່ຽວຂ້ອງເຂົ້າຮ່ວມ. ໃນໂອກາດດຽວ​ກັນ, ກະຊວງປ້ອງກັນປະເທດແຫ່ງ ສປປ ລາວ ໄດ້ປະດັບຫລຽນໄຊ ພິລະອາດຫານຊັ້ນ 3 ໃຫ້ສະຫະບໍລິສັດຮ່ວມມື ເສດຖະກິດ-ການທະຫານເຂດ 4 ທີ່ໄດ້ປະກອບສ່ວນຢ່າງຕັ້ງໜ້າ ທາງດ້ານເຫື່ອແຮງ, ສະຕິປັນຍາ ໃນການກໍ່ສ້າງໂຄງການສຳເລັດຕາມແຜນການ.