ນະຄອນຫລວງວຽງຈັນ ຈະເລັ່ງແກ້ໄຂຄວາມບໍ່ເປັນລະບຽບຮຽບຮ້ອຍ 4 ຂົງເຂດ
ທ່ານ ແກ້ວພິລາວັນ ອາໄພລາດ ຮອງເຈົ້າຄອງນະຄອນຫຼວງວຽງຈັນ ຜູ້ຊີ້ນຳວຽກງານເສດຖະກິດ ແລະ ພັດທະນາຕົວເມືອງ ໄດ້ລາຍງານໃນກອງປະຊຸມລະຫວ່າງຄະນະປະຈຳພັກ 3 ພາກສ່ວນ (ນະຄອນຫຼວງວຽງຈັນ ກະຊວງປ້ອງກັນຄວາມສະຫງົບ ແລະ ກະຊວງໂຍທາທິການ ແລະ ຂົນສົ່ງ) ທີ່ຈັດຂຶ້ນວັນທີ 11 ຕຸລາ 2017 ທີ່ຫ້ອງວ່າການປົກຄອງ ນວ ວ່າ: ເປົ້າໝາຍການຈັດສັນຄວາມບໍ່ເປັນລະບຽບຮຽບຮ້ອຍ ປະກອບມີ 4 ຂົງເຂດ 11 ກິດຈະກຳ ຄື: ຂົງເຂດການຄ້າມີ 2 ກິດຈະກຳ ໃນນັ້ນ ສຸມໃສ່ຕະຫຼາດຂົວດິນ ຕະຫຼາດທົ່ງຂັນຄຳ ຕະຫຼາດສີໄຄ ຕະຫຼາດໂນນຄໍ້ ຕະຫຼາດດອນໜູນ ຕະຫຼາດໂພນສະຫວ່າງ ຕະຫຼາດຫ້ວຍຫົງ ແລະ ຕະຫຼາດອື່ນໆທີ່ເຫັນວ່າມີຄວາມສັບສົນ ຈັດວາງສິນຄ້າຂອງຮ້ານຄ້າຂາຍຍົກ-ຍ່ອຍບໍ່ໃຫ້ເກີນຂອບເຂດເນື້ອທີ່ຮ້ານ ທີ່ໄດ້ຮັບອະນຸຍາດຂຶ້ນທະບຽນວິສາຫະກິດ.ສຳລັບຂົງເຂດໂຍທາທິການ ແລະ ຂົນສົ່ງມີ 5 ກິດຈະກຳ ຄື: ຈັດສັນບາງເສັ້ນທາງຄືນໃໝ່ ເປັນຕົ້ນ ແກ້ໄຂທິດທາງການສັນຈອນບາງເສັ້ນທາງໃຫ້ສັນຈອນທິດທາງດຽວ ເສັ້ນທາງເຂົ້າໂຮງຮຽນລາວ-ອາເມຣິກາ ຖະໜົນໂພນສີນວນ ຖະໜົນດົງປ່າລານ ຖະໜົນຄູວຽງ ຖະໜົນຈັນທະກຸມມານ ແກ້ໄຂການຈອດລົດການເຂົ້າ-ອອກ ແລະ ເຄື່ອນໄຫວໃນເມືອງຂອງລົດບັນທຸກລົດຮັບໃຊ້ ໃນການກໍ່ສ້າງທີ່ບໍ່ຖືກຕ້ອງ ຖະໜົນສຸພານຸວົງ ລ້ານຊ້າງ ຖະໜົນ ໄກສອນ ພົມວິຫານ ຈັດສັນຈຸດຈອດລົດຄືນໃໝ່ຕາມຖະໜົນ ບັນດາກິດຈະການທີ່ເຮັດໃຫ້ລົດຕິດ ຈັດສັນບັນດາສະຖານີຄິວລົດສອງແຖວ ແທກຊີ້ ຕຸກໆ ລົດຕູ້ ຈຳໂບ້ຄືນໃໝ່ ແລະ ຕະຫຼາດເຊົ້າ ຫ້າມນຳໃຊ້ເສັ້ນທາງ ແລະ ທາງຄົນຍ່າງເປັນບ່ອນຂາຍເຄື່ອງຊົ່ວຄາວ ຫຼື ເປັນປົກກະຕິ ແມ່ນບໍ່ອະນຸຍາດເດັດຂາດ ເພາະສ້າງຄວາມບໍ່ສະດວກໃນການສັນຈອນ ເປັນຕົ້ນ ຕະຫຼາດຂົວດິນ ຕະຫຼາດດອນໜູນ ເຂດຕະຫຼາດຫຼັກ 21 ຕະຫຼາດໂພນສະຫວ່າງ ຕະຫຼາດຫ້ວຍຫົງ ສີໄຄ ບຸກຄົນໃດຖ້ານຳສິນຄ້າທຸກປະເພດນຳໄປວາງໃນເຂດຫວງຫ້າມ ແມ່ນຈະຖືກປັບໃໝ ຕາມມາດຕາ 26 ຂອງດຳລັດ 188/ນຍ ແລະ ມະຕິຕົກລົງຂອງທ່ານເຈົ້າຄອງ ນວ ສະບັບເລກທີ 03/ສປຄ.
ເລັ່ງຮື້ຖອນສິ່ງຕໍ່ເຕີມກໍ່ສ້າງບໍ່ຖືກຕ້ອງກັບແຜນຜັງ ແລະ ສິ່ງຮົກເຮື້ອຕາມຖະໜົນຫຼວງ ແລະ ເສັ້ນທາງສຳຄັນໃນເທສະບານ ເກັບກູ້ສິ່ງເສດເຫຼືອຮົກເຮື້ອຕາມ ນວ ກຳແພງເຮືອນ ຕູບທີ່ຊຸດໂຊມ ໃຊ້ການບໍ່ໄດ້ ສິ່ງຕໍ່ເຕີມທີ່ບໍ່ໄດ້ອະນຸຍາດ ເທີບ ເງີບ ຜ້າຢາງກັ້ງແດດ-ຝົນລົ້ນຂອບເຂດອາຄານ ມ້າງເຮືອນຕູບ ຮົ້ວ ກຳແພງຊຸດໂຊມ ໃຊ້ການບໍ່ໄດ້ ແລະ ຮື້ຖອນ ປ້າຍໂຄສະນາທຸກຊະນິດ ທີ່ຕິດຕັ້ງບໍ່ຖືກລະບຽບ ແກ້ໄຂສິ່ງກີດຂວາງຕາມທາງຄົນຍ່າງ ແລະ ຕາມເຂດສາທາລະນະ ຈັດສັນຄວາມບໍ່ເປັນລະບຽບຮຽບຮ້ອຍໃນທຸກກິດຈະການກໍ່ສ້າງ ແລະ ສ້ອມແປງຕຶກອາຄານ.
ນອກຈາກນັ້ນ ເລັ່ງແກ້ໄຂຄວາມບໍ່ເປັນລະບຽບຮຽບຮ້ອຍ ຂົງເຂດພະລັງງານ-ບໍ່ແຮ່ ແລະ ໄປສະນີໂທລະຄົມມະນາຄົມ ແລະ ການສື່ສານ ເປັນຕົ້ນ ຊຸມສາຍໄຟຟ້າ ສາຍໂທລະສັບ ແລະ ສາຍເຄເບີ້ນຕາມເສັ້ນທາງຫຼວງແຫ່ງຊາດ ແລະ ເສັ້ນທາງຫຼັກ 21 ເສັ້ນ ໃນ ນວ ແລະ ຕາມເທສະບານເມືອງ ຕາມຕະຫຼາດ ແລະ ຊຸມຊົນແອອັດ ພ້ອມນັ້ນ ໄດ້ເລັ່ງຈັດສັນຄວາມເປັນລະບຽບຮຽບຮ້ອຍຂົງເຂດວັດທະນະທຳ-ສັງຄົມ ມີ 3 ກິດຈະກຳ ຄື: ການບໍ່ປະຕິບັດກົດໝາຍ ຫຼື ກຳນົດໝາຍທີ່ກຳນົດໄວ້ ແລະ ກະທົບເຖິງຊຸມຊົນໃນສັງຄົມ ແລະ ບົດບາດວັດທະນະທຳທີ່ດີຄວາມສີວິໄລ ເປັນຕົ້ນ: ການມົ້ວສຸມດື່ມສິ່ງມຶນເມົາ ອາລະວາດຕີກັນ ຮ້ານຄາລາໂອເກະ ແລະ ຮ້ານກາເຟຢອດທີ່ລາມົກອານາຈານໃນເຂດກາງເມືອງ ສາສະໜາສະຖານ ເຂດສຳນັກງານ ແລະ ສະຖານການສຶກສາ ໂຄສະນາ-ຮ້ອງເພງທີ່ບໍ່ຖືກຕ້ອງກັບວັດທະນະທຳ ການເປີດສຽງດັງເກີນຂອບເຂດ ແລະ ເກີນໂມງອະນຸມັດ. (ຂ່າວຫນັງສືພິມວຽງຈັນໃຫ່ມ)
No comments:
Post a Comment