ຂປລ. ວັນທີ 29 ກັນຍາ 2017 ນີ້, ທ່ານ ສະເຫລີມໄຊ ກົມມະສິດ ລັດຖະມົນຕີກະຊວງການຕ່າງປະເທດ ແຫ່ງ ສປປ ລາວ ໄດ້ໃຫ້ກຽດຕ້ອນຮັບການເຂົ້າຢ້ຽມຂ່ຳນັບຂອງ ທ່ານ Wilbur Ross, ລັດຖະມົນຕີກະຊວງການຄ້າ ແຫ່ງ ສະຫະລັດອາເມລິກາ, ພ້ອມດ້ວຍຄະນະ ໃນໂອກາດເດີນທາງມາຢ້ຽມ ຢາມ ແລະ ເຮັດວຽກ ຢູ່ ສປປ ລາວ ໃນລະຫວ່າງວັນທີ 28-30 ກັນຍາ ນີ້.
ໃນໂອກາດດັ່ງກ່າວ, ທ່ານ ສະເຫລີມໄຊ ກົມມະສິດ ໄດ້ສະແດງຄວາມຍິນດີຕ້ອນຮັບ ແລະ ຕີລາ ຄາສູງຕໍ່ການເດີນທາງມາຢ້ຽມຢາມ ສປປ ລາວ ຄັ້ງທຳອິດ ຂອງລັດຖະມົນຕີກະຊວງການຄ້າ ຂອງສະຫະລັດອາເມລິກາ, ເຊິ່ງເປັນໂອກາດອັນສຳຄັນ ໃນການປຶກສາຫາລື ເພື່ອເພີ້ມທະວີການພົວພັນສອງຝ່າຍ ໃນດ້ານການຄ້າ-ການລົງທຶນ ໃນຕໍ່ໜ້າ, ພ້ອມທັງໄດ້ສະແດງຄວາມຍິນດີ ຕໍ່ການເຊັນສັນຍາ ລະຫວ່າງ ບໍລິສັດ Convalt-GE Energy ຂອງອາເມລິກາ ກັບທະນາຄານ Cathay United Bank ເພື່ອພັດທະນາໂຄງການພະລັງງານແສງຕາເວັນ ຢູ່ພາກໃຕ້ຂອງລາວ ແລະ ການເຊັນບົດບັນທຶກຄວາມເຂົ້າໃຈ ວ່າດ້ວຍ ການສ້າງຕັ້ງສູນສົ່ງເສີີມ ນັກທຸລະກິດເພດຍິງ (Women’s Entrepre neurial Center), ເຊິ່ງຈະເປັນການປະກອບສ່ວນອັນສຳຄັນ ໃນການເສີມຂະຫຍາຍການພົວພັນຮ່ວມມືສອງຝ່າຍ ກໍຄື ໃຫ້ແກ່ການພັດທະນາເສດຖະກິດຂອງ ສປປ ລາວ.
ພ້ອມກັນນັ້ນ, ທ່ານ ສະເຫລີມໄຊ ກົມມະສິດ ໄດ້ຕາງໜ້າໃຫ້ລັດຖະບານ ແລະ ປະຊາຊົນລາວ ສະແດງຄວາມຂອບໃຈ ໄປຍັງລັດຖະບານ ສະຫະລັດອາເມລິກາ ທີ່ໄດ້ໃຫ້ການຮ່ວມມື ຊ່ວຍ ເຫລືອ ແກ່ ສປ ປ ລາວ ໃນໄລຍະຜ່ານມາ, ໂດຍສະເພາະວຽກງານເກັບກູ້ລູກລະເບີດ ທີ່ຍັງບໍ່ທັນແຕກ, ການສຶກສາ, ສາທາລະນະສຸກ, ການຄວບຄຸມ ແລະ ປາບປາມຢາເສບຕິດ ກໍຄື ການບັງຄັບໃຊ້ກົດໝາຍ ແລະ ອື່ນໆ.
ໃນຂະນະດຽວກັນ, ທ່ານ Wilbur Ross ກໍໄດ້ສະແດງຄວາມຂອບໃຈ ຕໍ່ທ່ານ ສະເຫລີມໄຊ ກົມມະສິດ ທີ່ໄດ້ສະຫລະເວລາອັນມີຄ່າ ໃຫ້ການຕ້ອນຮັບອັນອົບອຸ່ນ ໃນຄັ້ງນີ້, ພ້ອມທັງແຈ້ງ ຈຸດ ປະສົງ ຂອງການເດີນທາງມາຢ້ຽມຢາມ ສປປ ລາວ ໃຫ້ທ່ານລັດຖະມົນຕີກະຊວງການຕ່າງປະເທດ ຊາບ ຕື່ມອີກ.
No comments:
Post a Comment