ນີ້ຄືພາບຄວາມລຳບາກຂອງປະຊາຊົນ ກໍ່ຄືພະນັກງານທີ່ທຽວການຈາກເສັ້ນທາງແຕ່ 4 ແຍກໄຟແດງຕານມີໄຊ ເມືອງໄຊທານີ-ສາມແຍກສີເກີດ ເມືອງນາຊາຍທອງ ນະຄອນຫຼວງວຽງຈັນ ດ້ວຍໄລຍະທາງ 9,3 ກິໂລແມັດ ເຊິ່ງປະຊາຊົນທ່ານໜຶ່ງບອກວ່າ: ໃນແຕ່ລະມື້ຖືວ່າມີຄວາມລຳບາກຫຼາຍ ເພາະໄລຍະນີ້ກຳລັງກໍ່ສ້າງທາງ.
ສະນັ້ນ, ຈື່ງເຮັດໃຫ້ທາງເປື້ອນໃນຕອນຝົນຕົກ ແລະ ຖ້າມື້ໃດຝົນບໍ່ຕົກ ກໍ່ຈະຢູ່ໃນສະພາບຝຸ່ນສີແດງຄວັນກຸ້ມທັງສອງຝາກທາງຈົນເກືອບແນມບໍ່ເຫັນກັນ ສົ່ງຜົນໃຫ້ເຄື່ອງນຸ່ງງາມໆໄປການປານໄປນາພຸ້ນແລ້ວ. ສຳລັບຕອນຄ່ຳ ເສັ້ນທາງນີ້ພັດບໍ່ມີໄຟເຍືອງທາງ ເຮັດໃຫ້ທາງມືດບໍ່ຄ່ອຍເຫັນກັນໃນເວລາລົດສວນທາງມາ, ຈຶ່ງຝາກໃຫ້ພາກສ່ວນກ່ຽວຂ້ອງຊ່ວຍເຫັນໃຈປະຊາຊົນແດ່ ອາດຈະຫົດທາງເປັນປະຈຳໃນໄລຍະແຫ້ງແລ້ງ ຫຼື ໄລຍະຝົນຕົກ ກໍ່ຕ້ອງມີການປັບໜ້າດິນເລື້ອຍໆ.
ເສັ້ນທາງດັ່ງກ່າວ ເປັນການລົງທຶນ ແລະ ກໍ່ສ້າງໂດຍບໍລິສັດເອກະຊົນແຫ່ງໜຶ່ງ ທີ່ເລີ່ມລົງມືກໍ່ສ້າງແຕ່ເດືອນຕຸລາ 2016 ຈະໃຫ້ສຳເລັດໃນທ້າຍປີ 2018. ສະນັ້ນ, ປະຊາຊົນຜູ້ທີ່ອາໄສຂົງເຂດນີ້ຜູ້ທີ່ໃຊ້ຖະຫນົນສາຍນີ້ຕ້ອງເຂົ້າໃຈ ແລະ ທົນລຳບາກອີກປີຈົນກວ່າທາງຈະແລ້ວ.
ຫນັງສືພິມເສດຖະກິດ-ການຄ້າ
No comments:
Post a Comment