ໄຊນາເຊົາເທິນແອລາຍເປີດເສັ້ນທາງບິນ ກວາງໂຈ່ວ - ວຽງຈັນ

ບໍລິສັດການບິນ ໄຊນາເຊົາເທິນແອລາຍ ໄດ້ເປີດເສັ້ນທາງບິນກວາງໂຈ່ວ - ວຽງຈັນຢ່າງເປັນທາງການໃນວັນທີ 27 ກັນຍານີ້ດ້ວຍຖ້ຽວບິນ CZ 6091/6092 ແລະ ບິນ 3 ມື້ຕໍ່ອາທິດຄື ພຸດ, ສຸກ ແລະ ອາທິດ. ໂດຍຕາມຕາຕະລາງການບິນຈະອອກເດີນທາງຈາກກວາງໂຈ່ວເວລາ 16:30 ໂມງ ເຖິງນະຄອນຫຼວງວຽງຈັນ 18:10 ໂມງ ແລະ ນະຄອນຫຼວງວຽງຈັນ 19:10 ໂມງ ເຖິງກວາງໂຈ່ວເວລາ 22:25 ໂມງ.
ການເປີດເສັ້ນທາງການບິນກວາງໂຈ່ວ-ວຽງຈັນຂອງສາຍການບິນ ໄຊນາເຊົາເທິນແອລາຍ ເທື່ອນີ້ເປັນໜຶ່ງໃນໂຄງການສຳຄັນໃນຍຸດທະສາດໜຶ່ງແລວທາງໜຶ່ງເສັ້ນທາງ ເຊິ່ງອຳນວຍຄວາມສະດວກໃນການໄປມາຂອງປະຊາຊົນສອງຊາດລາວຈີນກໍຄືການພົວພັນການຄ້າ, ການລົງທຶນ ແລະ ການແລກປ່ຽນວັດທະນະທຳເຊິ່ງກັນ ແລະ ກັນໃຫ້ວ່ອງໄວ ແລະ ໄດ້ຮັບການບໍລິການທີ່ມີຄຸນນະພາບ, ສ້າງເປັນຂົວຕໍ່ແຫ່ງມິດຕະພາບຂອງສອງປະເທດ.
ຫຼັງຈາກເປີດເສັ້ນທາງບິນດັ່ງກ່າວແລ້ວ, ຜູ້ໂດຍສານຈາກປະເທດລາວຈະໄດ້ຮັບການບໍລິການທີ່ວ່ອງໄວ, ທັນສະໄໝໃນການປ່ຽນເຮືອບິນເພື່ອເດີນທາງຕໍ່ໄປແຕ່ລະເຂດແຂວງຂອງຈີນ ແລະ ທະວີບເອີລົບ, ອາເມລິກາ, ໂອຊີອານີ ແລະ ຍີ່ປຸ່ນ, ສ.ເກົາຫຼີ ອື່ນໆ. ຂະນະທີ່ເຄື່ອງຂອງຜູ້ໂດຍສານທີ່ປ່ຽນເຮືອຢູ່ກວາງໂຈ່ວກໍສາມາດສົ່ງໄປເຖິງປະເທດປາຍທາງໄດ້ໂດຍບໍ່ຈຳເປັນຖ້າຮັບເອົາຫີບເຄື່ອງຢູ່ລະຫວ່າງທາງ.
ບໍລິສັດການບິນ ໄຊນາເຊົາເທິນແອລາຍ ມີເຮືອບິນຫຼາຍກວ່າ 700 ລຳ ແລະ ເປັນບໍລິສັດໃຫຍ່ກວ່າໝູ່ໃນອາຊີ ແລະ ເປັນທີ 4 ຂອງໂລກ. ຜ່ານມາໄດ້ເປີດເສັ້ນທາງບິນກັບຫຼາຍປະເທດ.
ຂໍ້ມູນ-ພາບ: CRI