ວັນທີ 19 ກັນຍາ 2017 ທ່ານ ບົວສອນ ບຸບຜາວັນ ຫົວໜ້າສະຖາບັນຄົ້ນຄວ້າເສດຖະກິດແຫ່ງຊາດ ພ້ອມດ້ວຍຄະນະ ໄປຢ້ຽມຢາມຄວາມຄືບໜ້າໂຄງການກໍ່ສ້າງສະຖາບັນມະຫາວິທະຍາໄລຊູໂຈ ປະຈຳລາວ (ມຊລ) ທີ່ຕັ້ງຢູ່ບ້ານຊຽງດາ ເມືອງໄຊເຊດຖາ ນະຄອນຫຼວງວຽງຈັນ ຖືກຕ້ອນຮັບໂດຍທ່ານ ຫວງຊິ້ງ ຮອງອະທິການບໍດີ ມຊລ ພ້ອມດ້ວຍຄະນະ.
ໂອກາດນີ້ທ່ານ ຫວງຊິ້ງໄດ້ ແຈ້ງໃຫ້ຊາບວ່າ: ມະຫາວິທະຍາໄລຊູໂຈ ເປັນມະຫາວິທະຍາໄລແຫ່ງທຳອິດຂອງຕ່າງປະເທດ ທີ່ລັດຖະບານລາວອະນຸຍາດໃຫ້ສ້າງຕັ້ງຢູ່ລາວ ພ້ອມດຽວກັນກໍ່ເປັນມະຫາວິທະຍາໄລແຫ່ງທຳອິດ ທີ່ລັດຖະບານຈີນໄດ້ອະນຸຍາດໃຫ້ສ້າງຕັ້ງສາຂາຢູ່ຕ່າງປະເທດ ອີງຕາມແຜນພັດທະນາຂອງ ມຊລ ໃຫ້ກາຍເປັນມະຫາວິທະຍາໄລທີ່ມີທັງລະດັບປະລິນຍາຕີ ປະລິນຍາໂທ ແລະ ປະລິນຍາເອກ ມີທັງຫຼັກສູດບຳລຸງພາສາຈີນ ແລະ ເຝິກອົບຮົມທັກສະວິຊາຊີບຕ່າງໆ.
ສະເພາະສາຂາຫຼັກສູດການຮຽນມີສາຂາເສດຖະສາດ ບໍລິຫານ ກົດໝາຍ ທ່ອງທ່ຽວ ການຄົມມະນາຄົມທາງລົດໄຟ ແລະ ສາຂາອື່ນໆ ທີ່ແທດເໝາະກັບຄວາມຮຽກຮ້ອງຕ້ອງການໃນການພັດທະນາເສດຖະກິດ-ສັງຄົມຂອງລາວ ພັດທະນາໃຫ້ເປັນມະຫາວິທະຍາໄລແບບລວມສູນທີ່ມີຊື່ສຽງ ໃນແຖວໜ້າຂອງບັນດາປະເທດໃນອາຊຽນ ແລະ ສ້າງໂຮງໝໍທີ່ເປັນຂອງຕົນເອງ ເຊິ່ງມີເນື້ອທີ່ໃນການພັດທະນາທັງໝົດ 23 ເຮັກຕາ ປັດຈຸບັນ ໄດ້ພັດທະນາໄປແລ້ວ 6 ເຮັກຕາ ໃນໄລຍະເບື້ອງຕົ້ນສາມາດຮອງຮັບນັກສຶກສາໄດ້ 600 ຄົນ ມີອາຄານຮຽນ ແລະ ຫໍພັກນັກສຶກສາທີ່ອຳນວຍຄວາມສະດວກໂດຍລວມແລ້ວ ການພັດທະນາພື້ນຖານໂຄງລ່າງມາຮອດປັດຈຸບັນ ແມ່ນສຳເລັດໂດຍພື້ນຖານ ແລະ ພ້ອມທີ່ຈະຮັບເອົານັກສຶກສາຮຸ່ນທຳອິດ ແລະ ເປີດການຮຽນ-ການສອນໃນສົກສຶກສາ 2018-2019.
ສ່ວນອະນາຄົດວິທະຍາໄລແຫ່ງນີ້ ຖ້າຫາກການພັດທະນາໂຄງການບັນລຸຄາດໝາຍ ຈະສາມາດຮອງຮັບນັກສຶກສາທັງພາຍໃນ ແລະ ຕ່າງປະເທດໄດ້ຈຳນວນ 10 ພັນຄົນ.
ຂ່າວ: ຫນັງສືພິມວຽງຈັນໃຫ່ມ
No comments:
Post a Comment